شعرا بس

يانسرين...فيه فرق واجد بينا الاثنين
نبي نفهمك بالعقل


انا عيشتى عصران..والفرق واجد ودلال الوان
ناحوشنا مبنى بلا عمدان...وانتى حوشكم تحت الوطا دورين
نا الكر هبة داتسن بلا بيبان...وانتم الكمرى زواقها لونيين
وانا معاشى بـ15زمان..وانتم بفيزا كرت صرافين
وانا لبستى عربي بلا كيطان..وانتى الوشاح تصميم سوريين
وأنا بوى وامى يبصم بصمان...وانتى بوك وامك الجامعة قارين
خوتى قروا في الجامع القرآن...خوتك مازالوا يحضروا في برلين
خوالي يربو فى الابل والضان...وانتى خوالك يتاجروا في الصين
وانتى على جاكسن اعلنتى أحزان...وانا سألت عليه أصله منين
وانتى ترقصي على الاروج والكمان...وانا على الزكرة نزيد حنين
وانتى تعطري بعطور من لوران...وانا بتايد نغسله الجبين
وانا سهرتي في البر والقيزان ..وانتى تابعي في صوفيا لورين
وأرقى ايكالى مبكبكة وعصبان...وانتى البتيزا وهمبورغا شكلين
وانا الشاهى وحيلتي الدخان...وانتى عصيرك راوخ وبيبسين
وانا الرفافة سعد يا عمران...وانتى وهنادى وجارتك نرمين



يانسرين...فيه فرق واجد بينا الاثنين

نبي نفهمك بالعقل


قاتلي عادى...انا من الحضر وأنت أصيل ابوادى
صحيح نا نبي الجو الهادي..وانتم على بسط شيء ملتمين
وانتم في كل مناسبة جرادي...وتقمعزوا باليوم واليومين
وانتم تحبوا وكالكم سقادى...تلاقوا عليها قصعة البازين
وانتم طبخكم في القدر والبرادى..ولا تعرفوا بكرج ولاطاجين
وتنور خبزه فيه عشر فرادى...وتحميس زميته اتكون عوين
وديما الحطب وناركم وقادي...وديما بزمايل رؤسكم لوين
وحتى عرسكم رابخ وحسه صادي...وغناكم علم وكشك مجرادين
والهد رزة اركيب أبو الفنادى..وتجبدوا في تاريخ راح دفين
وغير كيف كان النجع فيه مسادى...وميراد المعا طن بيه مفتخرين
وانتم عزا يزكم من أول بادي..على السبر تحلفك بمية ايمين
وتصير مشغلة في هداك قطع الوادي...اتجو بالمعيط كلكم فازعين
وانتم تحدروا للسوق بالميعادى..وانا التسوق دايره روتين
وانتو تنضوا الفجر وين ينادى..وانا الساعة اطناش هادا وين
وانا صباح الخير هاى لدادى..وانتو النشده تاخدو ساعتين
لا تعرفوا ساحات لا نوادى...ولاتعرفوا صالة ولا تمرين
وانا المزين هو حدود مرادي..وانتو عليه الكحل مصرين
وانا نبيه اللبس لي مقادى..وانتوا العباية كلكم رافضين
وانتم خبركم بالوصا ومنادى..وانا بلبيانا أندير رنين
وتفنيص ديما واتين قصادى...كل شيء كلمة وقص جديين
وكانك تبيها عاد حادي بادى..تأخر الخلفه عام ولا اتنين
وتبقى العزاره اتجى ودادي...وزينة الحياة بالمال والبنين
وتدوير المشاكل بين هادى وهادى..وحتى المرض يا لمس وله عين
نا عارفة عشتوا حياة انكادى...وقاسيتوا العازه من الزمان سنين
نا عارفة ربة طيور عوادي...عطتكم الصحراء درس للحيين
المطلوب تنسلخوا من المبادى..وتواكبوا عصر التطور زين
المهم مانبيش جو رمادي..نبيك تحضر كيفهم الآخرين
تغير اللهجة تقولي فؤادي...وشنج ياروحى وتم واكيين
ونعيشك في عز ياودادى...في قفص دهبى حياة عصفورين

يانسرين...فيه فرق واجد بينا الاثنين

نبي نفهمك بالعقل


يا أموره...أرجوك تسمعي نوضح معاك الصورة
موالك اللي في الرأس فيه خطوره..عيدى النظر وفيه شوفى زين
انتى تعرفي ناسى أصحاب مشوره...اجواد ليبيا بالصيت معروفين
وانتى تعرفي عادتنا المشهوره..كسابة وسيع الدير ركابين
وانتى تعرفي عيلنا أيجيب الدورة..كا في المدارس كيف حفظ الدين
وانتى تعرفى واكبنا مسار الثوره...من قبل ماتبداء بعشر سنين
وانتى تعرفي تاريخنا بسطوره..وأبطال في التاريخ مدكورين
وانتى تعرفي شامخ نخل بثموره...وانتى تعرفي بالعلم مشهورين
وانتى تعرفي زيتون سمح انظوره...مزارع وصناعات مكتفيين
وانتى تعرفي الثرات كل عصوره...مازال نحييو فيه ملتزمين
انا عارفك عشتى حياة مغموره...ما تعرفي اليسار من اليمين
سحنونه ودلوعه وربة بوره...كل شي واتى إيجيك حتى دين
بوك دللك مهوش عارف دوره...وأمك بسلطتها على المسكين
الحياة بالتجارب والأيام غروره..والخاتمة بالخير قولي أميين
وبالله يانسرين فضي السيره...على قولهم نا وانتى وين


يانسرين...فيه فرق واجد بينا الاثنين

نبي نفهمك بالعقل